ალდაგის განახლებული სტრატეგია და ვიზუალური იდენტობა
სულ ცოტა ხნის წინ, სადაზღვევო კომპანია „ალდაგი“ ცვლილებებით სახით წარდგა ბაზარზე, ახალი სტრატეგიითა და ვიზუალური იდენტობით. 33-წლიანი ისტორიის მქონე ბრენდმა საკუთარი კონტურები მკაფიოდ გამოხატა. დღეს, „ალდაგი“ არის ბრენდი, რომელიც მომხმარებლისთვის გონების ყოველდღიურ სიმშვიდესთან და შიშების დაძლევასთან იქნება დაკავშირებული. ის იქნება საიმედო დასაყრდენი, რომელიც ადამიანებს ყოველდღიურ შიშებთან გამკლავებაში დაეხმარება. განახლებული ბრენდი ერთდროულად არის ემოციურიც და რაციონალურიც, საიმედოც და იმედისმომცემიც. სტრატეგიასთან ერთად, შეიქმნა ახალი ვიზუალური იდენტობა და კამპანია, რომლითაც „ალდაგმა“ განახლებული ბრენდის საზოგადოებისთვის გაცნობა დაიწყო. ბრენდის სტრატეგიაზე შოთა ჩინჩალაძემ იმუშავა, ვიზუალურ სტილზე სააგენტო Holy Motors-მა იზრუნა, კამპანია „ბოლო კეთილია“ კი JWT Metro-სთან ერთად შეიქმნა. მოდით, ერთად გავეცნოთ „ალდაგის“ ისტორიული ბრენდის ხელახლა დაბადების ამბავს.
როგორ ჩამოყალიბდა „ალდაგის“ ბრენდის სტრატეგია?
შოთა ჩინჩალაძე: სადაზღვევო ინდუსტრიასთან პროფესიონალური შეხება აქამდეც არაერთხელ მქონია, ამდენად განსხვავებულ პროექტზე მუშაობა საინტერესო აღმოჩნდა ჩემთვის. ჩვენი მთავარი ამოცანა სტრატეგიულ რებრენდინგზე მუშაობა იყო. „ალდაგის“ გუნდს უკვე ჰქონდა გარკვეული სამუშაოები ჩატარებული, თუმცა ბრენდის სტრატეგია ძირეულად უნდა გაგვეახლებინა. სამუშაოების ფარგლებში, განვსაზღვრეთ ბრენდის სამი უმთავრესი საყრდენი. ერთი მხრივ, შევთანხმდით, როგორი უნდა იყოს „ალდაგის“ ბრენდის გამოცდილება.მკაფიოდ გამოვკვეთეთ ბრენდის კატეგორია და ვერბალური იდენტობის დონეზე შევქმენით ნარატიული თაღი.
ძალიან საინტერესოა ის, რომ განახლებული სტრატეგია ბუნებრივად ასახავს ბრენდსა და გუნდს. 33 წელია, რაც „ალდაგი“ ინდუსტრიის ლიდერია და აქვს დიდი ხნის ისტორია. ის იყო პირველი, რომელმაც საქართველოში დაზღვევის ინდუსტრია შემოიტანა და საკანონმდებლო დონეზეც მნიშვნელოვანი წვლილი აქვს ამ სფეროში. ამხელა წარსულს თავისი სიმძიმეც მოყვება ხოლმე და როგორც წესი, საკმაოდ რთულია ამ დროს კომპანიის უკვე კარგად გამოცდილ თანამშრომლებთან ახალ სტრატეგიულ პოზიციაზე საუბარი, საჭირო მოქნილობის მიღება. თუმცა ალდაგის გუნდის სასახელოდ უნდა ითქვას, რომ პროცესი მოქნილად წარიმართა და და საბოლოო ჯამში, საკმაოდ პროდუქტიულიც გამოდგა.
ქეთევან მაღალაშვილი: დაარსების დღიდან, ალდაგმა რამდენჯერმე განაახლა ბრენდი. მთავარ სიმბოლოში 2013 წელს გამოჩნდა სარკმელი, რომელიც დროთა განმავლობაში იცვლებოდა და გარკვეული იდეების გარშემო ვითარდებოდა. წელს, როდესაც ვიზუალური სტილის განახლება გადავწყვიტეთ, დავალება იყო, რომ შეგვენარჩუნებინა ლოგოს ფორმა, თუმცა მზად ვიყავით ხელშესახები ცვლილებებისთვისაც. ცხადია, დიზაინზე მუშაობის პროცესი გაყვა ბრენდის სტრატეგიას, რომლის მთვარი გზავნილი შიშების დამარცხება და რაციონალური მექანიზმით, დაზღვევის დახმარებით, მშვიდი გონების მოპოვებაა. ვფიქრობ, რომ სწორედ ეს შედეგი მივიღეთ. ახალი სტილი ზუსტად გამოხატავს ჩვენს სტრატეგიულ გზავნილს და მოიცავს ჩვენი ბიზნესის როგორც ემოციურ, ისე რაციონალურ განზომილებებს – ერთი მხრივ ვხედავთ მზის შუქს, რომელიც მშვიდ გონებასთან, ემოციურ ბალანსთან ასოცირდება, ხოლო მეორე მხრივ შტრიხკოდის ელემენტებს, რაც სიმბოლურად მონაცემებს, სტატისტიკურ ინფორმაციას განასახიერებს.
- როგორია განახლებული „ალდაგი“, როგორც ბრენდი?
შოთა ჩინჩალაძე: სტრატეგია საკმაოდ ღრმა და მრავალფენიანია. ამ დროისათვის, საზოგადოებამ სტრატეგიის მხოლოდ პირველი ეტაპი იხილა, რაც შიშებზე საუბრით დავიწყეთ. „ალდაგში“ ძალიან კარგად ესმით, რომ თანამედროვეობის ყველაზე ძვირფასი განძი გონების სიმშვიდეა და რომ გაუთვალისწინებელი, უარყოფითი მოვლენებს მიღმა, ამ უნიკალური რესურსს უამრავი სხვა, ყოველდღიური მტერი ჰყავს და მათ შორის ყველაზე ძლიერი ჩვენი ყოველდღიური შიშებია. თავად „ალდაგის“ ისტორიაც ასეთია – ოპერირება იმ პერიოდში დაიწყო, როდესაც ნაბიჯის გადადგმის ყველას ეშინოდა და ზოგადად, უსაფრთხოების განცდა იშვიათი ფუფუნება იყო. ახლა კი, შიშების დამარცხებაში დახმარება მათი დღის შუქზე გამოტანით დავიწყეთ.. სწორედ ამ კუთხით განავითარა Holy Motors-მაც განახლებული ვიზუალური იდენტობა. დღეს, „ალდაგი“ არის შიშებთან მებრძოლი ბრენდი, რომელიც ადამიანებს ყოველდღიურად გონების სიმშვიდეს სჩუქნის. M: ვიზუალური იდენტობა როგორ შემუშავდა? გიორგი ავალიანი: ვიზუალური ენა ორ მიმართულებას ეყრდნობა – ერთი მხრივ, სარკმელს, საიდანაც მზის სითბო შემოდის, სიმბოლურად მზის შუქის დანათებით ქრება შიშები, რომლებიც სწორედ მაშინ გვიშლის ხოლმე ხელს, როცა გონების კუნჭულებში გადავმალავთ ხოლმე. მეორე მხრივ, იყო თავად „ალდაგის“ გუნდის რაციონალური მიდგომა საქმისადმი, რაც ასევე აისახა ვიზუალურ იდენტობაში. ცვლილებებია ბრენდის ფერთა გამაშიც – უფრო თბილი ფერები შემოვიდა პალიტრაში და ასახა სარკმელში შემომავალი მზის შუქი.
- როგორი იყო სამუშაო პროცესი?
შოთა ჩინჩალაძე: ყველაზე საინტერესო იყო ის, რაც თავად „ალდაგის“ გუნდისგან მოვისმინე. ძალიან მკაფიოდ ჰქონდათ ნაფიქრი ჩამოყალიბებული – რისთვის ვართ? რა არის ბრენდის დანიშნულება? ამ დანიშნულების გააზრება მსგავს ინდუსტრიაში უმნიშვნელოვანესია. პირველივე სამუშაო შეხვედრაზევე გაჟღერა სიტყვებმა, რომელიც მერე ბრენდის დანიშნულების განაცხადად იქცა: საფუძნების დღიდან, ჩვენ ყოველდღიურად ვამარცხებთ შიშებს და ვაძლიერებთ ინდივიდებს, ბიზნესებსა და საზოგადოებას. შეიძლება ითქვას, ეს სიტყვები იქცა ბრენდის ახალი სტრატეგიის ერთ-ერთ უმთავრეს საძირკველად. ქეთევან მაღალაშვილი: ვფიქრობ, ბრენდის იდენტობა, ახლა, ბევრად გამოხატულია. მუშაობის პროცესში, შოთა იკვლევდა, როგორ არის აღქმული ბრენდი თანამშრომლების მხრიდან,როგორია თავად ბრენდის ისტორია, როგორ ხედავენ ბრენდს ადამიანები, რა შინაარსისა და ღირებულებების მატარებელია „ალდაგი“. სწორედ ამ ინსაითებზე დაფუძნებით შეიქმნა ბრენდის ახალი სტრატეგია.
- განახლება კამპანიით აღნიშნეთ. როგორ შეიქმნა „ბოლო კეთილია“?
ქეთევან მაღალაშვილი: ბრენდის ახალი სტრატეგიის შესაბამისად, ვიზუალური სტილის განახლებას მოჰყვა კრეატიული კამპანია, რომელიც JWT Metro-სთან ერთად დავგეგმეთ. ბრენდის გზავნილიდან გამომდინარე,, „მშვიდი გონებით“ უნდა ყოფილიყო კამპანიის მთავარი სლოგანიც, თუმცა ბევრი განხილვის და მსჯელობების შემდეგ გადავწყვიტეთ, რომ ფორმულირება უფრო კრეატიული მიმართულებით წაგვეყვანა. ასე შეიქმნა კამპანიის გზავნილი „ბოლო კეთილია“, JWT Metro-ს გუნდთან ერთად. ისეთი რაციონალური პროდუქტი, როგორიც დაზღვევაა, იმდენად ლაღად და მარტივად არის გადმოცემული, რომ ვფიქრობ, ყველასთვის გასაგები და მისაღებია. გამოხმაურებებიდანაც ასე ჩანს.
