წინასაშობაო კრაკოვი
25 დეკემბერი, 2019
უცხო ქვეყნის სტუმრობა ყველაზე მეტად წინა საახალწლო პერიოდში მიყვარს, ამ დროს თითქოს ყველა უფრო ბედნიერია, ჯადოსნური და ბრჭყვიალა სურნელი დგას ქალაქში. პოლონეთის პატარა, ისტორიული და ლამაზი ქალაქიც არ ყოფილა გამონაკლისი. კრაკოვი ძალიან საინტერესო, ისტორიით მდიდარი ქალაქია, რომელიც ჩასვლისთანავე უამრავ ისტორიასა და ლეგენდას მოგიყვებათ.
თავიდან საშობაო ბაზრობის სამშობლოდ უფრო მეტად გერმანულენოვანი ქვეყნები ითვლებოდა. ბაზრობის მიზანი იყო, რომ მოსახლეობას ზამთრის სეზონისთვის საჭირო ნივთები და პროდუქტები მოემარაგებინა. დროთა განმავლობაში ეს ტრადიციად იქცა და ბევრ ქალაქში საშობაო ბაზრობა ნამდვილი დღესასწაულია.
ციმციმა ქუჩები, ხის პატარა ლამაზი სახლები, გლიტვეინის, შემწვარი წაბლისა და ნაციონალური კერძების შერეული სურნელი, ხალხის ჟრიამული და საახალწლო მელოდიების ჰანგები დამხვდა კრაკოვის საშობაო ბაზრობაზე. ამოუწურავი ადგილია! გგონია ყველაფერი ნახე, მეორე დღეს მისულს კი სულ სხვა სიახლეები გხვდება. ყველაზე მარტივი გზაა, ერთ სივრცეში გაიგო ყველაფერი ქვეყნის შესახებ, დააგემოვნო მათი გამორჩეული და საყვარელი კერძები, გაეცნო ადგილობრივ პროდუქციას, შეიძინო საჩუქრად ხელნაკეთი ნივთები და აქსესუარები, მოუსმინო ქალაქის ლეგენდებს, რადგან დრაკონების სიმრავლის ფონზე, აუცილებლად გაგიჩნდება კითხვა მისი ისტორიის შესახებ. და რაც ყველაზე საინტერესოა, დააკვირდე ხალხს, მათი გართობის სტილს, ასე უფრო ნათლად აფასებ და ეცნობი გარემოს.
ზღაპრული ელფერი დაჰკრავს კრაკოვს დეკემბერში. ბევრი ოჯახის ტრადიციაა ყოველ დასვენების დღეს მოაწყოს ერთობლივი გასეირნება საშობაო ბაზრობაზე, ერთად მიირთვან საყვარელი კერძები, მიიღონ მონაწილეობა ადგილზე გამართულ თამაშებში, უყურონ ლამაზ ინსტალაციებს, გადაიღონ ფოტოები ტრადიციულ სამოსში გამოწყობილ გმირებთან და პერსონაჟებთან.
2008 წელს Times-მა კრაკოვის საშობა ბაზრობა ყველაზე ლამაზ ბაზრობად აღიარა ევროპაში, ხოლო 2016 წელს CNN-მა იგივე სტატუსი მიანიჭა.