ალდაგი მცირე და საშუალო კომპანიებს ფინანსური სერვისების მიღებაში დაეხმარება

გაზიარება:

სადაზღვევო კომპანია ალდაგი კლიენტ კომპანიებს კვალიფიციური სპეციალისტებისგან ფინანსური სერვისების მიღებაში დაეხმარება.

ახალი კანონმდებლობის თანახმად, 1 ოქტომბრამდე წლიური ანგარიშის მომზადება და ფინანსთა სამინისტროს ზედამხედველობის სამსახურში წარდგენა მცირე და საშუალო ზომის კომპანიებსაც (SME) მოეთხოვებათ. ალდაგი მზადაა, დაეხმაროს კლიენტ კომპანიებს სწრაფად ადაპტირდნენ კანონის ახალ მოთხოვნასთან, უფასოდ გაიარონ შესაბამისი ტრენინგი, რათა სრულფასოვნად და დროულად წარადგინონ ფინანსური ანგარიშგების დოკუმენტი ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურში (SARAS).

უფასო ტრენინგს ალდაგის კლიენტებისათვის ჩაატარებს წამყვანი აუდიტორული და ბუღალტრული კომპანია „ფინანსური ოფისის“ მმართველი პარტნიორი მიხეილ ჭელიძე დარგის სპეციალისტებთან ერთად. ტრენინგი ჩატარდება 24 სექტემბერს, 12:00-15:00 საათზე, სასტუმრო ჰოლიდეი ინში.

ტრენინგი მოიცავს შემდეგ თემებს: 

• მარეგულირებელი კანონმდებლობის, კომპანიების ვალდებულებების, არსებული შეღავათებისა და რისკების მიმოხილვა;

• მეოთხე კატეგორიის საწარმოების ფინანსური ანგარიშგების სტანდარტის მიმოხილვა;

• ფინანსური ანგარიშგების საერთაშორისო სტანდარტის მიმოხილვა (ფასს) მცირე და საშუალო საწარმოებისათვის;

• ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის (saras) პორტალზე კომპანიის რეგისტრაცია და კანონის შესაბამისად ანგარიშგების ატვირთვა.

ალდაგსა და ფინანსურ ოფისს შორის  გრძელვადიანი თანამშრომლობის მემორანდუმიც გაფორმდება, რომლის თანახმადაც ალდაგი თავისი კლიენტებისათვის 100 000 ლარის ოდენობით თანადაფინანსების ბიუჯეტს გამოყოფს,  რაც ნიშნავს, რომ ალდაგი თავის კლიენტ კომპანიებს ფინანსური ოფისის სერვისების მიღებას მნიშვნელოვნად დაუფინანსებს.

„ჩვენი მიზანია, ჩვენს კლიენტ კომპანიებს დავეხმაროთ ოპერირების პროცესში, რათა მათ შეძლონ საკუთარი ბიზნესის წარმატებულად ფუნქციონირება, გაფართოება და განვითარება. მზად ვართ, ვითანამშრომლოთ სხვადასხვა წამყვან პროვაიდერ კომპანიებთან, რათა ჩვენს კლიენტებს მაქსიმალურად მორგებული სერვისები და ფასები შევთავაზოთ.“- განაცხადა ალდაგის გენერალურმა დირექტორმა, გიორგი ბარათაშვილმა.

აუდიტორული კომპანია ფინანსური ოფისი დამოუკიდებელ ბუღალტრულ და იურიდიულ კომპანიათა  წამყვანი საერთაშორისო ასოციაცია MSI Global Alliance-ის წევრი და საქართველოში ერთადერთი წამომადგენელია, რომელიც მომხმარებლებს სთავაზობს როგორც ბუღალტრულ და აუდიტორულ, ისე საგადასახადო მომსახურებას.